Mat 14 | MHL | STEP | Aria iir nain owow saria Erot-ke Yeesus meta miimap

Matthew 14

Erot-ke Yon Baptais ifakimok

(Mak 6.14-29, Luk 3.19-20 ne 9.7-9)

1 Aria iir nain owow saria Erot-ke ^{▼▼14.1Erot fain unuma oko Antipas, Galili kame wia urufiya. Ona wiawi pun unuma Erot, eena Yeesus imenarek iir nain os-ke saria maneka ikua.} Yeesus meta miimap 2 ona uuwow mua wia maakek, “Mua nain-na Yon Baptais-ke. O iiriw ifakimemkun umok nain aakisa kiiriw iikirak. Naapeya kekanowa onaiya ikok maa miililina imeniya,” naap maek. 3 Aria Yon umok nain feenap. Erot ona weepe Filip emeria Erodias wiar aawok. 4 Naap oneya Yon-ke amukarem-ikua, “No neepe emeria wiar aawon nain sira eliwa me onan!” 5 Naap amukareya Yon opap koora-pa wuap baliwep kaikak. Ne ifakimekam naek-na wi Yuuda wia keker opap me ifakimok. Moram wi mua unowa Yon Baptais profet-ke naemik. 6 Nan ikaeya iir oko Erot ona imenarek nain mokoma pepek ereya ona fofa neeke enow maneka onak. Ne Erodias wiipa-ke wi tapu maneka mokoka-pa wia ufem-ikomak. Ne Erot ufowa nain wiar urufap mokoka kuok. 7 Ne farep maakek, “Yo opor makena maiyem, no maa mauwa-ko kookalep maeya-na kakeniw niinen!” 8 Naap maakeya onak wiar ikiweya maakeya orop Erot maakek, “Yo feenap kookaliyem, yo Yon Baptais ikiwosa maiyem. Epira-pa wuap pekapeya urufinen.” 9 Erot Yon ifakimowa nain kema wiisarep kema samor maneka ikua. Nain o iiriw ona tapu mokoka-pa yo opora makena maiyem naek. Naapeya wiipa nain maakek, “Eliw, no kema opominen.” 10 Naep ona ami mua wia sesekeya Yon koora-pa ikua nain ikiwep imakuna puukap woosa epira-pa wuap amapikiwemi wia ofakowamik. Ne wiipa nain-ke aawep onak amapikiwomak. 12 Ne aria Yon teeria-ke meta nain miimap ekapemi sawi napuma mia ara muutiw aawep pikiwep soopamik. Soopap-puap ikiwep Yeesus maakemik.

Yeesus mua tausen ikur (5,000) maa wienakek

(Mak 6.31-44, Luk 9.10-17, Yon 6.1-13)

13 Ne Yeesus naap wiar miimap owowa nain piipuap ona waisow aasa aawep ikiwok. Ikiwep epa mua marew-pa neeke ikainen naek. Wi emeria mua unowa o epa ikiwok nain miimap mereniw ookap ikiwemik. 14 Naeya o eka okaiwi ekap fuunek-na wi yakeyak wi kiikir ekapep taanep ikemik. Naap wia urufap manek akena wia kemalep wi napum onaiya ikemik nain wia saliwak. 15 Ne urerareya ona teeria-ke ekap maakemik, “Epa fain owowa marew, ne urerarek. Naapeya wia sesekeya wiena ikiwep owowa-pa maa enowa-ko wiar sesenaruk.” 16 Naap maakiwkin wia maakek, “Weetak, wi me ikiwuk. Nis-ke maa enowa wienakeka!” 17 Ne maakemik, “Sa, i emer ikowa ikur ne mera erup, muut naap.” 18 Ne wia maakek, “Naapeya-na aawep yo pekapomeka.” 19 Pekapiwkin wia maakek, “Wia maakiwkin neeke pokomakuk.” Aria wi pokiwkin emer ikowa ne mera nain aawep iinan mokakemi Mua Maneka sira eliwa naakek. Sira eliwa naakep-puap emera nain wu-wuepap ona teeria wieya emeria mua unowa nain wienakemik. 20 Ne wi unow onaiya enep pepek eramik. Ne enakiwa kireya inera-pa iparemik. Inera ten kuisow erup naap taanek. 21 Wi teeria maa enemik nain wi emeria ne muuka wiipa me wia tuunamik, wi mua muutiw wia tuunamik nain tausen ikur.

Yeesus eka iinan-pa soomarek

(Mak 6.45-52, Yon 6.16-21)

22 Aria Yeesus ona teeria kiikir wia sesekeya aasa suuwap orop miimep ikiwep eka okaiwi ikiwemik. Ikiwiwkin ona waisow nan ikok yakeyak wia sesekeya wiena owowa ikiwemik. 23 Ikiwiwkin Mua Maneka farekam naep ema urupok. Urupep nan ikaeya kokomarek. 24 Ne aria ona teeria aasa-pa ikiwemik nain ikiwep epasia aremik. Ne ewar maneka-ke iikireya eka muun iri-ikiwemi aasa wiar molepam-ikua. 25 Naap ikok epa wiiwim naap Yeesus-ke eka iinan-pa soomar-ekapem-ikaeya 26 urufap kema tootonep samor akena karanep kiriremi maemik, “Sawur-ke yee!” 27 Naap karanem-ikaiwkin wia maakek, “Ni kekaneka. Aa yos-ke. Ni me keker opaka.” 28 Ne Pita-ke iikirami maakek, “Maneka, nosiya-na ekape efa naeya orop eka iinaniw nookap ekinen.” 29 Naap maeya maakek, “Eliw ekapinan!” O aasa-pa pikinep orop eka iinaniw soomaremi Yeesus ookap ekak. 30 Nain ekam-ikok ewar kekanowa nain furewap keker opak. Keker opap bulunarep oromi kiriremi maek, “Maneka sa, yo efa opa aa!” 31 Naeya ewur akena wapena wafurami opap maakek, “No moram karanin? Yo kekanowa marew naap efa naen-yon aa!” 32 Ne aria wi ekap aasa urupiwkin ewar puok. 33 Ne wi mua papako aasa-pa ikemik nain o miir onoma-pa keema muuna mikami maemik, “Maken akena, no Mua Maneka Muuka-ke.”

34 Aria wi ekap Genesaret-pa fuunemik. 35 Ne wi owowa nain Yeesus urufap os-ke naemik. Naapeya opora sesekiwkin napum mua unowa wia pekapemik. 36 Ne Yeesus omawami maakemik, “I mia suuwowa miirfa muutiw nefa tiimami sariariyen noma.” Ne naap onap sariaromakemik.